Qərbi Kaspi Universiteti alman universitetləri ilə görüşdə iştirak edib
Qərbi Kaspi Universiteti Almaniyanın iyirmiyə yaxın nüfuzlu universitetləri ilə görüşlərdə iştirak edib. Görüşlərdə iki ölkə arasında ali təhsil sahəsində əməkdaşlığın genişləndirilməsi, akademik mübadilə proqramlarının inkişaf etdirilməsi və elmi-tədqiqat sahəsində birgə layihələrin həyata keçirilməsi kimi vacib məsələlər müzakirə olunub.Görüşlər çərçivəsində universitetlər arasında birgə elmi araşdırmaların təşkili, innovativ tədris metodlarının tətbiqi və tələbələr üçün yeni təhsil imkanlarının yaradılması məsələləri müzakirə edilib.
Qərbi Kaspi Universitetinin nümayəndələri Almaniyanın ali təhsil ocaqları ilə tələbə və müəllim mübadilə proqramlarının genişləndirilməsi, beynəlxalq konfrans və seminarların təşkili, eyni zamanda, birgə magistratura və doktorantura proqramlarının yaradılması istiqamətində əməkdaşlıq perspektivlərini nəzərdən keçiriblər.
Alman universitetlərinin nümayəndələri də Azərbaycanda ali təhsilin inkişafı ilə maraqlandıqlarını bildirərək, Qərbi Kaspi Universitetinin beynəlxalq əlaqələrinin genişlənməsini yüksək qiymətləndiriblər. Onlar tələbələrin xaricdə təhsil almaq və elmi araşdırmalara qatılmaq imkanlarını artıracaq layihələrə dəstək verməyə hazır olduqlarını qeyd ediblər.Görüşlərdə müzakirə edilən əsas məsələlərdən biri də ikili diplom proqramlarının yaradılması olub. Tərəflər tələbələrin həm Qərbi Kaspi Universitetində, həm də Almaniyanın nüfuzlu universitetlərindən birində təhsil alaraq iki diplom əldə edə biləcəyi modellər üzərində fikir mübadiləsi aparıblar. Bundan əlavə, Almaniyanın müxtəlif ali təhsil qurumları və elmi fondları tərəfindən xarici tələbələr üçün təqdim edilən təqaüd proqramları haqqında məlumat verilib. Qərbi Kaspi Universitetinin tələbələrinin bu təqaüdlərdən yararlanması üçün atılacaq addımlar və əməkdaşlıq mexanizmləri müzakirə edilib.Universitetlər arasında elmi-tədqiqat sahəsində əməkdaşlığın inkişafı məqsədilə beynəlxalq konfranslar, elmi forumlar və simpoziumların keçirilməsi planlaşdırılıb.
Görüşlər zamanı birgə tədqiqat mərkəzlərinin yaradılması və elmi məqalələrin beynəlxalq jurnallarda nəşri məsələləri də diqqət mərkəzində olub.Qərbi Kaspi Universiteti dünya universitetləri ilə əməkdaşlığın inkişaf etdirilməsinə xüsusi önəm verir. Bu çərçivədə Almaniya universitetləri ilə qurulan əlaqələr universitetin beynəlxalq nüfuzunu artırmaqla yanaşı, tələbə və müəllim heyətinə daha geniş imkanlar yaradır.
